ارشادات انتخابات التجديد النصفي

ارشادات انتخابات التجديد النصفي 

------------------------------------------

إن شاء الله يوم الجمعة القادم 14 مارس ... انتخابات التجديد النصفي .. والبوست دة هيكون بمثابة الضوء اللي هيمشي عليه أي شخص هيشارك فيها أو عاوز يستفسر عنها 

1-يعني ايه انتخابات تجديد نصفي ؟؟؟؟؟
********************************
مجلس النقابة بعد سنتين من توليه النقابة بيعمل انتخابات على نصف عدد أعضاؤه يعني على 12 عضو على مستوى الجمهورية والمحافظات والانتخابات بتكون ليوم واحد من الساعة 9 صباحا الى 5 مساء في مكان نقابتك الفرعية 

2-متطلبات الانتخاب :-
*********************
أولا : لازم تكون مقيد بالنقابة ومسدد اشتراك النقابة العامة لغاية سنة 2013 وبكرر تاني اشتراك النقابة العامة فقط ..اشتراك النقابة الفرعية قصة تانية خالص أهم شيء اشتراك النقابة العامة واللي مسددش ممكن يسدده يوم الانتخاب عادي 

ثانيا : يكون معاك الكارنيه وبطاقة الرقم القومي عشان المستشار المسئول عن لجنة الانتخابات هيطلع عليهم واللي معاه الكارنيه الجديد مش هيحتاج غيره عشان فيه الرقم القومي 

3-نظام الانتخاب:
*************************
أولا : حضرتك هتتوجه لنقابتك الفرعية .. هتشوف لجنتك الانتخابية في الكشوف المتعلقة هناك أو هيكون فيه ناس متطوعة تساعدك وبعدين تتوجه للجنة بتاعتك هتوريهم الكارنيه والبطاقة وتمضي جنب اسمك وتستلم منهم 3 استمارات مدون بهاأاسماء كل المرشحين هتعلم على الأسماء اللي انت عاوزها :

الاستمارة الاولى للمرشحين فوق السن )
========================
هتنتخب فيها 3 أسماء فقط وخلي بالك لازم 3 فقط عشان لو انتخبت عدد أكثر أو أقل هيكون الصوت باطل 

الاستمارة التانية ( للمرشحين تحت السن )
=============================
هتنتخب 3 أسماء فقط وبكرر تاني 3 فقط مش أكثر ولا أقل عشان متبطلش الصوت 

الاستمارة الثالثة ( مرشحين القطاعات )
=====================
هتنتخب فيها اسم واحد فقط وبكرر تاني واحد فقط ... وكل واحد هينتخب على حسب محافظته... بمعنى القطاعات متقسمة للآتي :

1-قطاع محافظات القاهرة والجيزة : ودول للأعضاء التابعين لمحافظات القاهرة والجيزة 

2-قطاع محافظات الدلتا ودي متقسمة للآتي :

شرق الدلتا وتضم محافظات ( الشرقية – الدقهلية – دمياط – بورسعيد – الاسماعيلية – السويس – شمال وجنوب سيناء )

وسط الدلتا ( القليوبية – المنوفية – الغربية – كفر الشيخ )

غرب الدلتا ( البحيرة – الاسكندرية – مرسى مطروح )

3-قطاع محافظات الصعيد ودة متقسم للاتي :

شمال الصعيد ويضم محافظات ( الفيوم – بني سويف – المنيا )

جنوب الصعيد ويضم محافظات ( أسيوط – سوهاج – قنا – الأقصر – أسوان – الوادي الجديد – البحر الأحمر )

كل واحد يشوف محافظته تابعة لأي قطاع وبناء عليه هيختار اسم مرشح القطاع وبكرر تاني اسم واحد فقط 

******************
ملحوظة :
***************
1- الزملاء التابعين لمحافظة قنا بالإضافة ل 3 الاستمارات دول هياخدوا 3 استمارات تانية عشان ليهم حكم محكمة فالانتخابات هتكون كاملة عندهم وال 3 الاستمارات التانية هيختاروا فيها الآتي :

استمارة : لاختيار نقيب النقابة الفرعية لقنا 
استمارة : لاختيار 3 أعضاء لمجلس النقابة الفرعية تحت السن 
استمارة : لاختيار 3 أعضاء لمجلس النقابة الفرعية فوق السن 

2- الزملاء التابعين لمحافظة المنوفية هياخدوا استمارة زيادة فوق ال 3 استمارات لاختيار نقيب المنوفية

وبعد كدة هتحط الاستمارة في الصندوق المخصص ليها وتحط صباعك في الحبر وتاخد كارنيهك وخلاص ... الموضوع مش هياخد منك وقت ... المهم انك تكون ايجابي وتشارك