الاحتباس الحراري في الدواجن

من طرف **هويدا** الإثنين أبريل 28, 2014 7:41 pm

موضوع هام جداا عن الاحتباس الحراري في الدواجن .. أخطر أمراض الصيف
بالنسبه للاجهاد الحراري وهو اخطر امراض الصيف
بسرعه جدا ولضيق الوقت هاتكلم عن شوية معلومات مهمه عن الاجهاد الحراري او الاحتباس الحراري وشوية معلومات قد تكون جديده للكثير مننا
والموضوع بالبلدي كده ومن واقع الخبرات واعمال المزارع و ليس كلام كتب او كلام نظري
بالنسبه للصيف والاجهاد الحراري فهو من اخطر الامراض التي احيانا نعجز عن علاجها او الحد منها
وذلك لانه يسبب نفوق عدد كبير جدا من العنابر وخصوصا العنابر المصممه بطريقه عشوائيه وليس بها اي تجهيزات او متطلبات للجو الحار
ويتمثل خطر الاجهاد الحراري علي الدواجن لان الفراخ مفيهاش غدد عرقيه ولا مسام في الجلد وبالتالي الفرخه بتكتسب حراره ومش بتفقد اي حراره من جسمها
وهنا يحصل احتباس حراري وتموت الفرخه
وكمان معلومه مهمه جدا وهي ان الفرخ يقدر يستحمل الحراره لحد40 الي 41 درجه مئوية
خلي بالك ان دي درجه حراره الفرخ مش درجه حراره العنبر .. يعني لو الحراره في العنبر لو تكون من 22 الي 27 فان درجة حرارته تكون 41 تقريبا
وده زي ماقلت لان مفيهوش مسام ولا غدد عرقيه .. وكمان لان الجلد مغطي بطبقه دهنيه سميكه تمنع فقد الحراره
والبعض منا عارف ان طريقه فقد الحراره في الفراخ عن طريق العرف والدلايات
وسبحان الله ربنا وهب الفراخ الاكياس الهوائيه اللي هي تقدر تكتسب الهوائ البارد وعن طريقه تقدر تبرد جسمها
ومعلومه ع الطاير برده ان الفرخ يقدر يستحمل رطوبه لحد 60 % فقط لا غير
فيه معلومه مهمه دايما بقولها للمربيين وهو انهم يضعوا المنتجات والادوية الخاصه بالحر في سقوه بالليل او سقوه الفجر وليس اثناء النهار .. ودي مثلا زي فيتامين ج vit. C
وفيه معلومه مهمه عن فيتامين سي وهو انه يعمل في درجه حراره 37 درجه مئوية
اي انه يعمل في درجه الحراره الطبيعيه للانسان
معلومه تانيه ان شكل النافق في الفرخه الميته من الحر ::
ودايما بشوف شكل الفرخه اللي بتعاني من الحر . بتكون نايمه علي بطنها وماده راسها للامام واحيانا بتفرد رجلها للخلف ( اللي هو وضع الموت في حاله الاصابه بالامراض التنفسيه المزمنه ) سبحان الله
وبما اننا في الصيف ودرجه الحراره دلوقتي ماشيه من 35 الي 38 و في بعض المناطق بتوصل لحد 40 درجه .. ففي المناطق دي ممكن درجه حراره الفرخ توصل لحد 60 و 70 درجه مئوية يعني لااااااااااازم هايموت ويتخرب بيوت المربيين زي ماتخرب بيتي كده والفراخ ماتت عندي من الحر ههههههههههههههههههههههه
طب ياعم محسن انجز وبطل رغي وقول اذاي نقدر نواجه الحر في الصيف ::
شوف يا لولل ::
لازم تكون العنابر مصممه تصميم صحيح بحيث تكون اتجاهها قبلي بحري وليس شرق غرب
بحيث تخلي الهواء جاي من بحري لقبلي
يفضل في تصميم العنابر حاليا ان تكون من الطوب اللبن (الطوب الني )لانه بيلطف الجو جدا والحراره فيه بتكون جميله و مش حر زي المباني المسلح
او تبني بالطوب الاحمر بس تدهن العنبر من بره ومن جوه بالطين ده برده بيلطف الجو
يفضل طبعا وجود عدد كبير من المنافذ والشبابيك والمناور وغيرها
وبنصح المربيين اللي بيعملوا عنابر جدديده انهم يخلوا الشباك علي ارتفاع متر عشرين من الارض
تركيب عدد كافي من الشفاطات في العنبر ده مهم جدا لتلطيف الجو وتظبيط الحراره في الداخل ... بس ياريت بلاش فقاقه وتركب شفاط عرضه 30 في 30 زي بتاع المطبخ
لكن شفاطات المزارع بتبقي 70 في 70 ودي بتبقي كبيره جدا وبتشفط الريحه في العنبر كويس
خلي بالك انك ممكن تركب الشفاط في اي اتجاه الا الاتجاه البحري ... بس يستحسن تركبه قبلي وغرب او قبلي وشرق
طبعا تركيب المراوح في العنبر مطلوب ولكنه مش مهم اوي زي الشفاطات .. لان المروحه ماهي الا بتقلب الهواء في المكان لكن الشفاط بيشفط الهواء السخن من جوه عشان يدي مساحه للهواء البارد من بره انه يدخل للعنبر
يستحسن برده انك تزرع اي اشجار حوالين العنبر من بره عشان الهواء ويضلل ع المنطقه ويمنع تاثير الشمس المباشر
بعد كده حاجه مهمه اوي وهي تقليل العدد في العنبر .. يعني لو عنبر بياخد الف فرخه .. تعالي علي نفسك شوية ونزل 800 بس عشان الزحمه والكثافه والنفس السخن
يعني لو مكان 100 متر ونزلت فيه 750 او 800 فرخ يبقي عسل ووتبقي برنس
بعد كده يامعلم عاوزك تعرف ان الحراره العاليه مش بتاثر علي الكتاكيت الصغيره لان لسه جسم الفرخ صغير وممكن يتحمل لحد درجه حراره الجو تكون 35 او 37 .. ولكن المشكله بتبقي في الاعمار الكبيره بدايه من عمر 25 يوم تقريبا لما الوزن يبتدي يزيد
طب ياسيدي دلوقتي انا عمر الفراخ عندي كبير وعاوز اقلل عنهم خطورة الحر والاحتباس الحراري .. أعمل ايييييييييييه؟؟
اولا بالنهار هاترفع عنهم العلف خالص من الساعه 8 او 9 الصبح لحد مثلا الساعه 6 المغرب او بمعني اصح لحد مالجو يطري والحر يروح
يعني مفيش ادامهم اي حبه علف لان الفرخه اللي هاتاكل هاتطلع حراره وطاقه واحنا مش عاوزين حراره خااااالص
وبمعني اصح الفرخه اللي هاتاكل هاتموت في ثواني الا ربع
ثانيا: الميه المستخدمه تكون مياه ساقعه علي طووول ومش سخنه عشان تقلل الحراره شوية
طب اذاي بقي يا ابو الفقاقه ؟؟
بص يامعلم... هاتعمل عندك اكياس ثلج في التلاجه ومكعبات تلج وكل ماتيجي تسقي الفراخ في الحر هاتحط التلج في البراميل اللي بتسقي فيها بحيث تسقع الميه علي طول
وممنوع منعا باتا انك تتمشي وسط الفراخ بالنهار في الحر .. عشان لو مشيت هاتخليهم يجروا ويطيروا ويطلعوا حراره برده
ولكن عاوزك تراقبهم من بعيد بحيث لو شفت اي فرخه تعبت من الحر وكده وتلحقها
طب الحقها اذاي ياعم محسن :: ؟؟؟؟؟
والله انا شايف انك تمسك الفرخه وتغطسها بالميه في ميه ساقعه عشان تساعد علي فقدها للحراره بسرعه
واحد يقولي ايه ياعم الجنان ده كده الفرخه ممكن تاخد برد ؟؟؟!! ؟؟
اقوله انا اهون عندي ان الفرخه تاخد برد ولا تموتش ياعم الحج. البرد علاجه سهل انما الموت ملوش علاج ( حكيم من يومك يابني ) هههه
في اثناء الحر الشديده بنصح طبعا برش المياه الساقعه علي الفراخ بالبخاخات البخاريه
يعني بخاخه كده شبه بخاخه المكوه بس بتكون كبيره شوية وبتودي الميه لمسافات طويله
وسعرها اعتقد 100 جنيه يعني مش غاليه وفي متناول جميع المربيين
رش الميه ع الفراخ بيفرفشهم وبيساعد علي تبريد جسمهم
ناس بتقولك نسقي اسبرين في الميه للفراخ .. ولكني قرات في كذا سورس ان السالسيليك اسيد او الاسبرين يصل لحد المعده ولا يمتص وممكن يسبب قرح شديده في المعده تؤدي للوفاه
ايه اهم الادوية اللي بستعملها في الحر يامعلم ؟؟
زي ماقلت في بدايه المقال فيتامين ج vitamin C
وهو جميل كعمله مضاد للتاكسد وبيرفع المناعه حتي تقاوم الحر
ايضا فيتامين ك 3 مهم جدا في الحر
ايضا الغسيل اي غسيل الكبد والكلي ومدرات البول وايضا مضادات السموم
وايضا اضافه ثنائي كربونات الصوديوم مهم جداااااااااااااااااااااااااااااا مع فيتامين سي عشان بيقلل تاثير الحموضه في الدم اللي الحر بيعملها
وزي ماقلت في بدايه المقال اني احط الفيتامينات وروافع المناعه في سقوه بالليل او سقوه الفجر عشان لما تشتغل تشتغل بالنهار في الحرررررررررررر
دلوقتي فيه منتجات فيها فيتامين سي وفيها كلوريد بوتاسيوم وكلوريد ماغنسيوم وكربونات صوديوم يعني منتجات معموله خصيصا للحر زي حاجه اسمها بيتاسترس 20 % وده جرعته جرام للتر
بالنوسبه لشكل البي ا في حاله الاحتباس الحراري فبلاقي احتقانات شديده في كل اجزاء الجسم
وانزفه دمويه تحت الجلد وفي عضلات الصدر والفخذين
واحمرار واحتقان شديد في القصبه الهوائية والبلعوم من الداخل والخارج
دي بعض المعلومات المهمه اللي تواردت في دماغي دلوقتي عن الحر .. والاحتباس الحرا
ري وياريت اي زميل فاضل له اي معلومه جديده ياريت يقولهالنا ولو جه في دمغي معلومه جديده هاكتبها ان شاء الله