" نقص الفسفور hypophosphatemia "

" نقص الفسفور hypophosphatemia "
بسم الله

" نقص الفسفور Hypophosphatemia "

اتكلم معكم اليوم عن مرض نقص الفسفور وهو يحدث (شهر مايو و يونية ) في هذا الوقت من السنة يعني بعد شهرين الي ثلاث شهور من علف البرسيم - يعني الحيوان ياكل برسيم متواصل لمدة اكثر من شهرين
الحدوته : لما كان البرسيم في حد ذاته نباتا ناقصا في مجموعة الفوسفات بالمعني الاخص عنصر الفوسفور ولما كان الفلاحين لايسمدون بسماد الفوسفوات " تقريبا اسمه ثنائي الفسفات " ويسمدون باليوريا او حتي لايسمدون فالبرسيم بيطلع نضيف مفيش فسفور خالص
ولما كان الفلاح - اقصد المصري - لا يعلف اي مركزات في فترة الربيع لوجود البرسيم وطبعا بيقولك ده ربيع الحيوان وهيفتح او ينور فيه وده بيحصل بالفعل ولكن يحدث المرض الذي يحدث كل سنه كالمعتاد
وطبعا الفلاح لا يضع اي املاح او غيره
وطبعا في الغالب لايجرع الحيوانات ضد الديدان سواء بالحقن او غيره فبالطبع الديدان عامله الواجب ولوحدها كفيله بعمل نقص في الاملاح

المهم:
الحيوانات المعرضه لحدوث الاصابة : الجاموس - البقر ( ده اللي شفته حتي الان لاني بتكلم من واقع خبره مش بسمع موضوع خدناه في محاضره)

الاعراض :
الاعراض تختلف في الجاموس عن الابقار
1- الجاموس:
- يحدث في المراحل الاولي اكل ورق البرسيم وترك عود البرسيم ( بيسموها بالفلاحي المصري بتقرطف في البرسيم )
- بعد كده تتجه لاكل النباتات الجافة مثل القش او غلافه الاذرة
- وفي اثناء ذلك تبدا تمشي بطريقة غير طبيعية ( يقولك الحيوان متكتف )
- انتاج اللبن ينقص للنصف
- جسم الحيوان يخس جدا لدرجة ان عظامه تظهر
- بعد كده لو مفيش تدخل طبي الحيوان يقطع الاكل تماما
- وبعد كده يحدث بول مدمم ( ويكون العوض علي الله )

2- الابقار :
البقر اعراضه تختلف تماما عن الجاموس
* اول ما يلاحظ الفلاح في البقر هو ظهور البول المدمم
* بالطبع يكون في بعض الحالات نقص في اكل البرسيم ونقص في اللبن ولكن في حالات اخري يكون بول مدمم والحيوان ماشاء الله عليه شغال اكل برسيم الله ينور ولكن يكون في هذه الاثناء نقص في اللبن
* في البقر يظهر نقص الفسفور بعد الولادة وطبعا معظم البقر بيولد في اول البرسيم او بعد البرسيم لانكوا طبعا مش عارفيين ان الفلاح بيحاول يظبط الميلاد في الميعاد ده عشان الحيوان يولد ويشبع ويظهر عليه الصراف estrus وطبعا ده الفلاح بيظبطوا قدر المستطاع في البقر والجاموس
* البقر ممكن يستحمل يومين بول مدمم وهو بياكل ثم يقطع الاكل مره واحده ويظهر عليه اعراض الصفرا نتيجة تكسير كرات الدم الزائد وعند ظهور اعراض الصفرا منصحكش تعالجه لانه في الغالب هيموت في ايديك طبعا الاعمار بيد الله


هههههه خلاصة القول :
في نهاية موسم البرسيم تصاب الابقار و الجاموس بمرض نقص الفوسفور نتيجة اكل البرسيم الغني بالكلسيوم لفترة طويلة وعدم اكل اي اضافات بها فوسفور مثل الردة مثلا مما يتسبب في خلل نسبة الكالسيوم و الفسفور في الدم مما يؤدي الي ظهور اعراض المرض و هي انقطاع الاكل انخفاض درجة الحرارة نصف درجة و ظهور بول مدمم و ضعف و كتاف الحيوان و قلة اللبن

و العلاج باعطاء مصدر للفوسفور مثل ثنائي فوسفات الصوديم في الاكل او الردة بالاخص
و اعطاء مركبات حقن للفوسفور مثل التونوفوسفان علي سبيل المثال او الكاتوزال
اعطاء آرينال فاتح للشهية و مركبات حديد و فيتامين ب

يجب التأكد ان المرض ليس bacillary heamoglobin uria لانة يسبب بول مدمم ايضا ولا يرفع درجة الحرارة ولا هو مرض طفيليات الدم التي قد تسبب بول مدمم ايضا و لكن تسبب ارتفاع في درجة الحرارة قد تصل الي 42 درجة
اتمني يكون المرض الان واضح و مفهوم

بارك الله فيك على الموضوع الجميل هذا

وبالخصوص على الجاموس لان

الجاموس ماعندناش بالجزائر

والله ماشاء الله جزاك الله ككل خير دكتور