ندوة ارشادية موضوعها اهمية التحصينات الدورية

من طرف **د علاء عكاشة** الأحد يونيو 25, 2017 8:43 am

بسم الله الرحمن الرحيم
الاخوة الاعزاء اطباء الارشاد البيطري
كما ذكرنا من قبل ان هناك بعض الندوات تحتاج ان يكون الكلام فيها بصورة جرعة مركزة و مكثفه حفاظا علي وقت المستمعين الحضور – و اليوم اكتب لحضراتكم ما اقوله في مثل هذه الظروف عن
"اهمية التحصينات الدورية و مشاكلها " ما يلي :
-----------------------------------------------------------
السادة الحضور كل عام و حضراتكم بخير
نحن موفودون من الطب البيطري و نتجول بجميع مساجد المحافظة لتعريف المواطنين باهمية التحصينات الدورية ضد الامراض الوبائية
و في البداية احب اوضح لكم انه لما كم الحيوانات التي تولد من الابقار و الجاموس بيساوي كم الحيوانات التي تنفق كل عام بسبب الامراض الوبائية و بالخصوص مرض الحمي القلاعية يبقي ده معناه ان تنمية الثروة الحيوانية في مصر محلك سر بدون اي نمو او تقدم و بردو ده معناه استمرار غلاء اسعار اللحوم و التي بدورها تتسبب في غلاء اسعار الدواجن و الاسماك و تاخر نمو الاقتصاد القومي و انخفاض سعر الجنية المصري
------------------------------------------------------------------------
واكيد كلنا نحب نعرف ايه سبب موت الحيوانات بهذا الشكل كل عام ؟؟ السبب هو ان معظم الفلاحيين و المربين لا يقومون بتحصين مواشيهم ضد تلك الامراض الوبائية الفتاكة – فمثلا القرية التي بها 3000 ثلاث الاف راس اللي بيحصن منهم فقط 300 ثلاثمائة راس و عشان كدة المرض بيجي كل سنة ياخد شوية من مواشينا و المرض اصبح معشش في بلادنا
---------------------------------------------------------------------
و من خلال لفي و لقائي بالفلاحين في الندوات فيه اللي بيقول ان عدم قيامه بالتحصين:
ان الحقنة بتاعة البيطري هيه اللي بتجيب المرض - السنة اللي عدت كانت باهيمي سليمة و بعد ما اخدت الابرة تاني يوم صبحت مريضة
-------------------------------------------------------------------------
احنا بنرد علي الكلام ده بنقول ايه :
ان الحيوانات كانت سليمة و رجعت من اللجنة تعبت تاني يوم
السبب يا اخوانا مش من ابرة الدكتور او من التحصين انما السبب ان احنا و احنا بنادي علي لجنة التحصين قبلها بيوم عشان نعرف الناس ميعادها و مكانها بنقول كمان و احنا بننده في الميكرفون ان اللي عنده حيوان مريض ما يجيبوش لجنة التحصين لان الحيوان لو جه و شم الحيوانات التانية حينقل لها المرض و كمان الحيوان طول ما رايح للجنة التحصين بينزل منه رياله و الريالة دي مليانة ملايين من الميكروب لما بتلزق في التراب و يجي شوية هواء و التراب ده يدخل نفس الحيوان السليم بينقله المرض او لو لوث اكله او شربه بردة ينقله المرض وده سبب ان الحيوان السليم جاله المرض
-----------------------------------------------------------------
يبقي الحل ايه ؟؟؟ الحل ان اللي عنده حيوان مريض ما يجبوش لجنة التحصين عشان ما ينشرش العدوي انما يحبسه في الزريبة و يعالجه
و اذا كان لسه عندك شك في ابرة اللجنة البيطرية اشتري لك اي سن بيطري و خلي الدكتور يجقن مواشيك بيه
الطب البيطري من اجلكم و من اجل الحفاظ علي ماشيتكم
كل عام و حضراتكم بخير
-------------------------------------------------------------
د علاء عكاشة مدير ارشاد كفر الشيخ